ئەنئەنىۋى يەرمەنكىمىز ئىتتىپاقلىق ئىچىدە مۇۋەپپەقىيەتلىك ئۆتكۈزۈلدى

تەشەككۈرنامە 

9- ۋە 10-ماي كۈنلىرى، ياۋروپا شەرقىي تۈركىستان مائارىپ جەمئىيتىمىز  ئەنئەنىۋى يېمەك - ئىچمەك  يەرمەنكىمىزنى ئىتتىپاقلىق، قېرىنداشلىق ۋە ھەمكارلىق روھى ئىچىدە   مۇۋەپپەقىيەتلىك ئۆتكۈزگەن بولدۇق.

بۇ مۇبارەك خىزمەتكە قاتنىشىپ، بىزنى يالغۇز قويمىغان ، يىراق-يېقىندىن كېلىپ قوللاپ-قۇۋۋەتلىگەن بارلىق قېرىنداشلىرىمىزغا، قانداشلىرىمىزغا ۋە سەپداشلىرىمىزغا جەمئىيەت ھەيئىتى نامىدىن چىن قەلبىمىزدىن مىننەتدارلىقىمىزنى بىلدۈرىمىز. سىلەرنىڭ سەمىمىي قوللىشىڭلار، دۇئالىرىڭلار ھەقىقەتەن  بىزگە كۈچ ۋە ئۈمىد بولدى.

يەرمەنكىمىزنىڭ تەييارلىقلىرى ئۈچۈن ھەپتە  بۇرۇنلا جەمئىيىتىمىزگە  كېلىپ، كېچىنى كۈندۈزگە ئۇلاپ، ئاشخانا، تازىلىق، توشۇش، تەشكىللەش ۋە ھەر قايسى خىزمەت ساھەلىرىدە زور پىداكارلىق كۆرسەتكەن خانىملارغا  ۋە قېرىنداشلارغا چىن قەلبىمىزدىن  رەھمىتىمىزنى ئېيتىمىز. ھەر بىر ئەجىرنىڭ ئاللاھ دەرگاھىدا سەدىقە جارىيە سۈپىتىدە  قوبۇل بولۇشىنى تىلەيمىز.

ئارىمىزدا بولالمىغان بولسىمۇ، ماددىي ۋە مەنىۋىي جەھەتتىن بىزنى قوللاپ تۇرغان قىممەتلىك خەير-ساخاۋەت ئىگىلىرىمىزگە ۋە كۆڭۈل دوستلىرىمىزغا ئالاھىدە رەھمىتىمىزنى بىلدۈرىمىز. قىلىنغان ھەر بىر ياردەمنىڭ مەزلۇم شەرقىي تۈركىستان خەلقىنىڭ ئاۋازى بولۇش يولىدا زور ئەھمىيەتكە ئىگە ئىكەنلىكىگە ئىشىنىمىز.

رەببىمىزدىن بۇ ئىتتىپاقلىقىمىز ۋە قېرىنداشلىقىمىزنى مەڭگۈ داۋاملىشىشى ھەمدە  قىلىنغان بارلىق خىزمەتلەرنى ئۆز دەرگاھىدا قوبۇل  قىلىشىنى سورايمىز . 

ئاللاھ ئەجىر سەرپ قىلغان بارلىق قېرىنداشلىرىمىزدىن رازى بولغاي.

بىرلىكىمىزنى، مېھىر-مۇھەببىتىمىزنى ۋە دەۋايىمىزغا بولغان ساداقىتىمىزنى داۋاملىق قىلغاي.

ياۋروپا شەرقىي تۈركىستان مائارىپ جەمئىيىتى